पांचौं बर्दघाट ब्यापार मेला आजदेखि शुरु हुंदै ,मेला अवधिभर झण्डै सय जना चर्चित कलाकार आउने
बुटवल, –पश्चिम नवलपरासीको बर्दघाटमा आज शुक्रबारदेखि पांचौ बर्दघाट कृषि, पर्यटन तथा औद्योगिक व्यापार मेला शुरु हुंदैछ । ‘कला, संस्कृति, उद्योग र व्यापार समृद्ध बर्दघाटको बलियो आधार’ नारासहित बर्दघाट उद्योग बाणिज्य संघको आयोजनामा बर्दघाट नगरपालिका–४ बर्दघाट मण्डपमा मेला हुन लागेको हो । मेलाको लुम्बिनी प्रदेश सांसद दिपेन्द्र कुमार अधिकारी, बर्दघाट नगरपालिकाका प्रमुख धिरज शर्मा बस्याल लगायतले दिउसो १ बजे उद्घाटन गर्ने कार्यक्रम छ ।
मेला उद्घाटन अघि बाजागाजासहितको झांकी ¥यालीले नगर परिक्रमा गर्ने कार्यक्रम रहेको आयोजक संघका कार्यसमिति सदस्य एवं सांस्कृतिक उपसमिति संयोजक खुमन बस्यालले बताए । मेलामा स्वदेशी र विदेशी गरी २ सय बढी स्टल रहने छन् । कृषिलाई प्राथमिकता दिइएको मेलामा कृषि र महिला उद्यमीलाई निःशुल्क स्टल उपलब्ध गराइएको छ । यस्तै संघमा आवद्ध उद्योगी व्यवसायीलाई स्टल भाडामा ५० प्रतिशत छुट गरिएको छ ।
व्यापार मेलामा जिल्लाका पर्यटकीय स्थलको प्रचार गर्ने उद्देश्यले डकुमेन्ट्री प्रदर्शन एवं कला संस्कृति,परम्पराको संरक्षणसमेत गर्ने उद्देश्यले मगर, थारु, नेवारलगायत जातिका परम्परागत घर र खानाका परिकारहरू पनि रहने कृषि, पर्यटन तथा संस्कृति व्यवस्थापन उपसमिति संयोजक गंगाप्रसाद पाठकले बताउनुभयो । मेला अवधिभर दर्शकलाई मनोरन्जन दिलाउन लोक दोहोरी, आधुनिक र हाँस्य विधाका राष्ट्रिय र स्थानीय गरी ८५ जना भन्दा बढी चर्चित कलाकारहरूको प्रस्तुतिसँगै बर्दघाट डान्स आइडल र टिकटक प्रतियोगिता आकर्षणको रुपमा रहने सांस्कृतिक उपसमिति संयोजक खुमन बस्यालले बताउनुभयो । फागुन २५ गतेसम्म चल्ने व्यापार मेलामा दुई लाख दर्शकले अवलोकन गर्ने र तीन करोड रुपैयाँको कारोबार हुने आयोजकको लक्ष्य रहेको बर्दघाट उद्योग बाणिज्य संघका अध्यक्ष लेखनाथ न्यौपानेले बताए ।
