उद्योग ब्यापार संघको पहल : व्यवसाय चलायमान बनाउन दुई दर्जन संस्थासंग अन्तरक्रिया र सुझाव संकलन

बुटवल,१७ फागुन ।  रुपन्देहीको ब्यापार व्यवसाय चलायमान बनाउन उद्योग ब्यापार संघ बुटवलले विभिन्न पेशागत र वस्तुगत व्यवसायिक संघसंस्थासंग सुझाव संकलन र अन्तरक्रिया गरेको छ ।
अन्तरक्रियामा व्यवसायिक संघसंस्थाका प्रमुखहरुले प्रदेश राजधानी बुटवलबाट दाङ सर्नु, कोराना महामारीको असर, आर्थिक मन्दी, चर्को बैंक ब्याज दर, महंगो घर भाडा,खुला सीमाबाट हुने तस्करी र भन्सार छली र युवा जनशक्तिको विदेश पलायन जस्ता कारणले रुपन्देहीको उद्योग,ब्यवसायमा संकट आएको बताए ।
रुपन्देहीको उद्योग व्यवसायलाई पुनः गुल्जार बनाउन व्यवसायिक संघसंस्थाहरु एकजुट भएर नीतिगत सुधारका लागि सरकारलाई दबाव दिनुपर्नेमा उनीहरुले जोड दिए ।
कार्यक्रममा बोल्दै नेपाल उद्योग ब्यापार महासंघका केन्द्रीय महासचिव खिमनारायण पराजुलीले विगतका सरकारले स्वाधीन र आत्मनिर्भर अर्थतन्त्र तथा ब्यापार विविधिकरणमा ध्यान नदिंदा मुलुक परनिर्भरता र ब्यापार घाटाले थिलोथिलो भएको बताए । देशको अर्थतन्त्र उत्पादनमुखी नभई राजस्व र रेमिट्यान्समुखी हुंदा अहिलेको अवस्था आएको महासचिव पराजुलीले स्पष्ट पारे ।
बैंकहरुको लगानी र व्यवसायको ठूलो हिस्सा सीमित व्यवसायिक घरानाको कब्जामा हुंदा साना तथा मझौला उद्योगी व्यवसायी सधैं मारमा परेका उल्लेख गर्दै पराजुलीले ठूला व्यवसायीको एकाधिकार तोड्न एकजुट हुनुपर्ने आग्रह गरे । बैंक सञ्चालकहरु नै उद्योगी व्यवसायीका संस्थाको नेतृत्वमा हुंदा उद्योगी व्यवसायीका समस्या समाधान हुन नसकेको पनि महासचिव परराजुलीले औंल्याए ।
उनले व्यवसायीको कारोबारको फूल अडिटको नाममा राजस्वका कर्मचारीलाई कमाई खाने भांडो भएकाले यसलाई नियन्त्रण गरिनुपर्ने बताए ।
उद्योगी व्यवसायीले भोगेका नीतिगत समस्याबारे महासंघले सम्बन्धित मन्त्रालय र विभागमा लिखित सुझाव दिएर समस्या समाधान गर्न सरकारलाई निरन्तर दवाव दिइरहेको भन्दै उनले अर्थतन्त्रमा अब सुधार आउने समेत बताए ।
संघका सल्लाहकार ज्योति भण्डारीले प्रदेश राजधानी सरेको लगायत कारणले रुपन्देहीको ब्यापार व्यवसाय धरापमा परेको र अब व्यवसाय चलायमान बनाउन सरकारको मात्र मुख नताकी व्यवसायी एकजुट भएर लाग्नुपर्ने बताए । उनले बुटवलको व्यवसाय र होटेललाई सस्तो र गुणस्तरीय ब्यापारिक हब बनाउनुपर्ने सुझाव दिए । व्यवसाय चौपट भएको अवस्थामा समेत राजस्वका कर्मचारी र प्रहरी प्रशासनले व्यवसायीलाई अनावश्यक दुख दिने गरेको भन्दै यो तत्काल रोकिनुपर्ने बताए ।
महासंघका केन्द्रीय सदस्य पुष्पराज ढकालले केन्द्रमा बस्ने ठूला व्यवसायीले साना मझौला व्यवसायीको पक्षमा नीति र ऐन कानून बन्न नदिने परिपाटी रोक्न लाग्नुपर्ने सुझाव दिए ।
उद्योग ब्यापार संघ बुटवलका अध्यक्ष विष्णुप्रसाद पाण्डेले रुपन्देहीका विभिन्नथरिका पेशागत र वस्तुगत ब्यापार व्यवसायमा देखिएका नीतिगत समस्याको पहिचान र व्यवसाय चलायमान बनाउने उपायको खोजी गरी महासंघलाई सुझाव दिन अन्तरक्रिया गरिएको बताए । अन्तरक्रियामा होटेल तथा रेष्टुरेन्ट व्यवसायी संघका अध्यक्ष लेखनाथ भण्डारीले रात्रीकालीन व्यवसाय सञ्चालन गर्न सके व्यवसायमा स्धार आउने बताए । घर बहाल सरोकार संघका अध्यक्ष राजु लिगलले स्पष्ट घर बहाल ऐन नहुंदा मनपरी र चर्को घर भाडा र घरधनीको मनोमानीले व्यवसायी मारमा परेको बताए । यस्तै उद्योग ब्यापार संघ कपिलवस्तुका अध्यक्ष खिमानन्नद पौडेल, मासु व्यवसायी संघका सचिव विशाल थापा,बुटवल अटो इन्जिनियरिङ एशोसिएसनका अध्यक्ष तुल्सीराम न्यौपाने,ग्रील तथा स्टिल व्यवसायी संघ रुपन्देहीका अध्यक्ष बुद्धिप्रसाद गुरुङ, मुद्रण उद्योग संघका अध्यक्ष पशुपति पौडेल,हाटबजार व्यवसायी संघका अध्यक्ष मनिराम पोखरेल,विद्युत व्यवसायी संघका अध्यक्ष लोकनाथ पोखरेल,व्यवसायी तुल्सी भण्डारी, ढुवानी व्यवसायी कमलराज ढुंगाना लगायतले खुला सीमाबाट हुने भन्सार छली र तस्करी, चर्को भन्सार दर, तस्करीमा स्वयं व्यवसायी र सुरक्षाकर्मीको संलग्नता, विना दर्ताका झोले व्यवसाय, राज्यको स्वदेशी व्यवसायीलाई संरक्षण गर्ने नीतिको अभाव जस्ता कारणले व्यवसाय धरापमा परेको धारणा राखेका थिए ।
संघका वरिष्ठ उपाध्यक्ष लोकनाथ पन्थी,उद्योग उपाध्यक्ष पदम जीसीले रुपन्देहीको व्यवसाय चलायमान बनाउने उपायको खोजीमा उद्योग ब्यापार संघ बुटवलले निरन्तर वहस र अन्तरक्रिया गर्ने बताए । अन्तरक्रियामा रुपन्देही र कपिलवस्तुका विभिन्न पेशागत र वस्तुगत गरी करिब ३० वटा व्यवसायिक संघसंस्थासंग सुझाव संकलन गरिएको संघका महासचिव यमलाल मरासिनीले बताए ।