अश्विन पंगेनी, चापाकोट स्याङ्जा — चापाकोट नगरपालिकामा आयोजना गरिएको ४८ घण्टे मेलमिलाप आधारभूत तालिम ८ दिनसम्म सञ्चालन भई सफलतापूर्वक सम्पन्न भएको छ। तालिममा मेलमिलाप प्रक्रियासँग सम्बन्धित सैद्धान्तिक र व्यवहारिक पक्षहरूबारे सहभागीहरूलाई जानकारी दिइयो। चापाकोटका १० वटै वडाबाट आएका समाजसेवी, महिला अगुवा, युवा, शिक्षक तथा स्थानीय प्रतिनिधिहरूको सहभागिता रहेको उक्त तालिममा प्रशिक्षकहरूले द्वन्द्व समाधानका विधि, आपसी सहकार्य, विश्वास निर्माण, सहिष्णुता र मेलमिलापका व्यवहारिक प्रविधिबारे प्रशिक्षण प्रदान गर्नुभयो। समापन समारोहमा प्रशिक्षक तथा संयोजकले समुदायमा दीर्घकालीन शान्ति स्थापना गर्न मेलमिलापको महत्वपूर्ण भूमिका रहेको उल्लेख गर्नुभयो।
सहभागीहरू परशुराम गिरी, शेषकान्त भण्डारी, शान्ती आचार्य र कल्पना रेग्मीले तालिम अत्यन्त उपयोगी रहेको बताउँदै, तालिमबाट सिकेका सीपहरू समुदायमै प्रयोग गर्ने प्रतिबद्धता जनाए। तालिम चापाकोट नगरपालिका र विभिन्न सरोकारवाला निकायहरूको समन्वयमा सम्पन्न गरिएको हो। समापन समारोहमा प्रमुख प्रशासकीय अधिकृत नेत्र प्रसाद घिमिरे, इलाका प्रहरी कार्यालय चापाकोटका प्रहरी नायब निरीक्षक दीपक मल्ल, वडा अध्यक्ष टोपलाल न्यौपाने, मोहन केसी लगायतले आफ्नो मन्तव्य व्यक्त गर्नुभएको थियो। ३० जना सहभागी रहेको उक्त तालिम नगर उप–प्रमुख इशा रानाको अध्यक्षतामा सम्पन्न भयो। कार्यक्रमको स्वागत मन्तव्य भूपराज बोस्तीले राख्नुभएको थियो भने सञ्चालन वडा नं. ८ का वडा सचिव शान्ती श्रेष्ठले गर्नुभएको थियो।
थप समाचार
सीएस .आइ. टी.एसोसिएसनमा नयाँ नेतृत्व
४ दिन अघि
