Tag: शान्ति नमुना#Shanti_school

तिलोत्तमा, चैत ३ । रुपन्देहीको तिलोत्तमा–५ मणिग्राम स्थित शान्ति नमुना माध्यमिक विद्यालयमा वृत्ति मार्गनिर्देशन कार्यक्रम अन्तरगत शिक्षाको संसारबाट कामको संसार चिनाउने कार्यक्रम सम्पन्न भएको छ । इन्स्योर परियोजनासँगको सहकार्यमा सञ्चालित कार्यक्रममा विषय विज्ञहरुहरुले विद्यार्थीहरुले रोजेको वृत्तिमा रहेका सम्भावना र अवसरका वारेमा प्रकाश पार्नुभएको थियो ।
कक्षा ९ का विद्यार्थीहरुलाई १२ समूहमा विभाजन गरी सञ्चालन गरिएको कार्यक्रममा डा. समिर गौतम, इन्जिनियर इश्वरी न्यौपाने, उद्यमी राजकुमार पाण्डे, सिए योगेन्द्र बास्तोला, स्टाफ नर्स गरीमा लामिछाने, होटल म्यानेजर सुवर्ण वर्मा, अभिवक्ता सञ्जीव बस्याल र व्यवसायी प्रकाश चापागाईले विभिन्न विषयमा सहजीकरण गर्नुभएको थियो ।
विद्यार्थीहरुलाई कितावी ज्ञानमा मात्र सिमित नराखी उनीहरुलाई सम्बन्धित क्षेत्रको वास्तविक अनुभव हासिल होस् भनेर यस प्रकारको कार्यक्रम गरिएको विद्यालयका प्रधानाध्यापक कुल प्रसाद लामिछानेले बताउनुभयो ।
विद्यार्थीहरुलाई थप ज्ञान हासिल गराउनका लागि सम्बन्धित क्षेत्रको अवलोकन भ्रमण समेत गराउने कार्यक्रम रहेको वृत्ति मार्ग निर्देशन कार्यक्रमका संयोजक रजनी के.सी. ले बताउनुभयो ।
कार्यक्रमको सञ्चालन वृत्ति मार्गनिर्देशन शिक्षक दिनेश खड्का र शिक्षक भीम भुसालले गर्नुभएको थियो ।
कार्यक्रममा करीव ६ सय २५ विद्यार्थीहरुको सहभागीता रहेको थियो ।

रुपन्देही,माघ २१ । रुपन्देहीको तिलोत्तमा वडा नं–५ मणिग्राममा रहेको शान्ति नमुना माध्यमिक विद्यालयले बिहिबार ६६ औं वार्षिकोत्सव तथा अभिभावक दिवस विविध कार्यक्रम गरी मनाएको छ ।
कार्यक्रममा बोल्दै लुम्बिनी प्रदेशका सामाजिक विकास मन्त्री जन्मजय तिमिल्सिनाले शिक्षालाइ सिपसँग जोड्नका लागि लुम्बिनी प्रदेश सरकार लागिपरेको भन्दै शिक्षाको अवसरबाट कोही पनि बञ्चित हुने अवस्था नहोस भन्नेमा आफू सचेत रहेको बताउनुभयो । उहाँले शान्ति नमुनाले सबैकाे मन जितेर देशकाे शैक्षिक उचाइ चुम्न सफल हुनुमा कुशल प्रशासन, मेहनती शिक्षक, सचेत अभिभावक र कर्मशिल विद्धार्थीकाे समिश्रण भएकाे बताउँदै यसलाइ निरन्तरता दिएर सधैं अब्बल बन्न अाग्रह गर्नुभयाे ।
कार्यक्रममा शिक्षा विकास तथा समन्वय इकाई रुपन्देहीका प्रमुख माधव बन्जाडे, शिक्षा तालिम केन्द्र लुम्बिनीका प्रमुख दिवाकर भण्डारी, सर्वोच्च अदालतका पूर्व न्यायाधीश  तेज बहादुर के. सी. , नेपाल शिक्षक महासंघ रुपन्देहीका अध्यक्ष लिलाधर न्याैपाने लगायतले विद्यालयको शैक्षिक विकासका लागि योगदान पु¥याउने प्रतिबद्धता जनाउदै शुभकामना दिनुभएको थियो ।
विद्यालय व्यवस्थापन समितिका अध्यक्ष शरद भट्टराईको अध्यक्षतामा भएको कार्यक्रममा प्रधानाध्यापक कुल प्रसाद लामिछानेले विद्यालयको वार्षिक प्रतिवेदन प्रस्तुत गर्दै देशकै उत्कृष्ट विद्यालय भएतापनि विद्यार्थी संख्याका आधारमा दरबन्दीको अभाव रहेको भन्दै शैक्षिक गुणस्तर कायम गर्नका लागि सरकारलाई सहयोगको दायरा बढाउन आग्रह गर्नुभयो ।
वार्षिकोत्सवका अवसरमा विद्यालयको बृहतर विकासका लागि योगदान पु¥याउने ५० जना शिक्षक कर्मचारी, १ जना सेवा निवृत शिक्षक, ७ जना समाजसेवी, १९ जना उत्कृष्ट अभिभावक र १० जना अक्षयकोषदातालाई सम्मान गरिएको थियो । यस्तै विद्यालयमा क्रियाशिल क्लवहरु मध्ये आर्ट क्लव र स्काउट क्लवलाई सम्मान गरिएको थियो ।
यसैगरी विद्यालयबाट कक्षा १२ उत्तीर्ण गरी यस वर्ष उच्च शिक्षा अध्ययनका लागि पूर्ण छात्रवृत्तिमा नाम निकाल्न सफल ५६ जना विद्यार्थीहरुलाई सम्मान गरिएको थियो भने एस.इ.इ.मा ए प्लस ल्याउने ५६ जना र कक्षा १२ मा ए प्लस ल्याउने ३९ जना विद्यार्थीहरुलाई पुरस्कृत गरिएको थियो । यसैगरी वर्ष उत्कृष्ट विद्यार्थीको रुपमा ११ जना विद्यार्थीहरुलाई सम्मान गरिएको थियो ।
यस्तै, शान्ति नमुनाले आयोजना गरेको जिल्ला स्तरीय हाजिरीजवाफ प्रतियोगितामा प्रथम हुने एभरेष्ट माध्यमिक विद्यालयलाई नगद रु.१२ हजार, द्वितीय स्थान प्राप्त गर्न सफल न्यू होराइजन बोर्डिङ स्कुललाई नगद रु.९ हजार, तृतीय हुने कान्ति मा.वि.लाई नगद रु ७ हजार र प्रोत्साहन स्थान प्राप्त सुनगाभा बोर्डिङ स्कुललाइ नगद रु. ४ हजार ५ सय, प्रमाणपत्र र मेडल सहित पुरष्कृत गरिएको प्रतियोगिताका संयोजक मोहन पौडयालले जानकारी दिनुभयो ।
कार्यक्रममा विद्यालयका सहायक प्रधानाध्यापक लोकनाथ कंडेलले स्वागत मन्तव्य राख्नुभएको थियो भने कार्यक्रमको सञ्चालन सहायक प्रधानाध्यापक दिपेन्द्र कुमार शाक्यले गर्नुभएको थियो । वार्षिकोत्सवका अवसरमा विद्यालयकाे वार्षिक मुखपत्र नानीकाे विमाेचन गरिएकाे थियाे भने विद्यार्थीहरुले पि.टि. प्रदर्शन, परम्परागत नृत्य, गायन तथा विभिन्न झाँकीहरु प्रस्तुत गरेका थिए । विद्यालयमा हाल करिव ६३ सय विद्यार्थीहरु अध्ययनरत छन् भने २ सय २९ जना शिक्षक कर्मचारी कार्यरत छन् ।

यसैबीच, शिक्षा क्षेत्रमा योगदान पु¥याउने पत्रकार सञ्जु पौडेललाई पुरस्कृत गरिएको छ । स्व. फत्त बहादुर-देउमती काउँचा स्मृति पत्रकारिता पुरस्कारबाट पौडेललाई नगद, दोसल्ला तथा करुवा सहित पुरष्कृत गरिएको हो । कान्तिपुर टेलिभिजनका संवाददाता रहनुभएका पौडेललाई शान्ति नमुना मा. वि. सहित सामुदायिक विद्यालयहरुको गतिविधिहरुलाई पत्रिकारिताको माध्यमबाट जनमानसमा पु¥याउन गरेको योगदान स्वरुप सम्मान गरिएको विद्यालयका सूचना विभाग संयोजक दिनेश खड्काले जानकारी दिनुभयो ।
यसैगरी, वार्षिकोत्सवमा अवसरमा सोमबार पुस्तक प्रदशनी गरिएको छ । विशाल पुस्तक सदन, बुटवल बुक्स मार्ट, ग्यालेक्सी बुक्स र श्रीराम बुक्स एण्ड स्टेशनरीसँगको सहकार्यमा पुस्तक प्रदर्शनी गरिएको हो । प्रदशनीमा शिक्षक, अभिभावक तथा विद्यार्थीहरुले आफुलाई मन पर्ने पुस्तकहरु खरिद गरेका थिए ।